Andijon viloyatidagi respublika ahamiyatiga molik ixtisoslashtirilgan tibbiyot markazlarining mintaqaviy filiallarida 28-30 sentyabr kunlari "Tibbiyot — korruptsiyadan xoli soha" shiori ostida "Ochiq eshiklar kuni" tadbiri o'tkazildi. Aksiya Sog'liqni saqlash vazirligi huzuridagi komplayens va korruptsiyaga qarshi kurashish ichki nazorat xizmati tashabbusi bilan tashkil etilgan.
Onkologiya va radiologiya ilmiy-amaliy tibbiyot markazining Andijondagi filialida tadbir doirasida 300 dan ortiq fuqaro skrining tekshiruvidan o'tkazilib, ular mutaxassis shifokorlar bilan bevosita maslahatlashish imkoniga ega bo'ldi. Tashkilotchilarning ta'kidlashicha, bunday tekshiruvlar xavfli kasalliklarni erta bosqichda aniqlash va oldini olishda muhim ahamiyat kasb etadi.
Xuddi shu kunlarda viloyat bolalar ko'p tarmoqli tibbiyot markazida ham shunga o'xshash tadbir bo'lib o'tdi — 470 dan ziyod bola tibbiy ko'rikdan o'tkazilib, ota-onalarga farzandlarining sog'lig'iga oid tavsiyalar berildi. Y.X. Turakulov nomidagi endokrinologiya ilmiy-amaliy tibbiyot markazining mintaqaviy filialida esa 285 nafardan ortiq fuqaro skriningdan o'tib, zarur holatlarda qo'shimcha mutaxassis ko'rigiga yo'naltirildi.
Shunday qilib, uch kun davomida viloyatdagi uchta yirik tibbiyot markazida jami 1000 dan ortiq kattalar va bolalar bepul tibbiy ko'rikdan o'tkazildi. Tashkilotchilar bunday tadbirlarning maqsadi nafaqat aholi salomatligini nazorat qilish, balki tibbiyot sohasida shaffoflikni ta'minlash va fuqarolarning shifokorlarga bevosita murojaat qilish imkoniyatini kengaytirish ekanini ta'kidlamoqda.
