Marhamat tumani markazidagi mahallalarda ichimlik suvi ta'minotini yaxshilash bo'yicha amaliy ishlar boshlandi. Tuman hokimi Ilyosbek Umrzaqov tashabbusi bilan yo'lga qo'yilgan ushbu ishlar aholini toza suv bilan barqaror ta'minlash hamda mavjud suv ta'minoti tizimini takomillashtirishga qaratilgan.
Ushbu yo'nalishda Andijon viloyati "Suv ta'minoti" aksiyadorlik jamiyati direktori D.Qo'ldashev hamda Suv ta'minoti vazirligi vakili ishtirokida tuman markazidagi ichimlik suvi ta'minoti holati o'rganildi. O'rganish chog'ida mavjud muammolar, tarmoq quvvatini oshirish va aholiga sifatli suv yetkazib berish imkoniyatlari muhokama qilindi.
Aniqlangan ehtiyojlar asosida Karkidon suv inshootida qo'shimcha 280 kub metr sig'imga ega suv rezervuari, ikkita suv nasos stansiyasi va suvni filtrlash moslamalarini o'rnatish ishlariga kirishildi. Bu infratuzilma loyihasi tuman markazidagi ichimlik suvi ta'minoti tizimining imkoniyatlarini kengaytirishga xizmat qiladi.
Mahalliy hokimiyat vakillari bildirishicha, amalga oshirilayotgan ishlar aholiga suv yetkazib berish jarayonini yaxshilash, tuman markazidagi mahallalarda ta'minot barqarorligini oshirish va xonadonlarni uzluksiz toza ichimlik suvi bilan ta'minlashga xizmat qiladi. Hokimlik aholi murojaatlari va ehtiyojlaridan kelib chiqib, infratuzilma masalalarini hal etish bo'yicha ishlarni izchil davom ettirishni rejalashtirmoqda.
